اختر نوم دَ خوشحالۍ دے خدائے چې هېر نهٔ کړې پهٔ دې کښې
دا موقع دَ امتحان ده ګورې فېل نهٔ شې پهٔ دې کښې
خوشحالي دَ نفس لږ وخت وي بيا دَ زړۂ دنيا وي ورانه
دا پهٔ ذکر حاصلېږي کهٔ برے وړې پهٔ دې کښې
اطينان دَ قلب حاصل کړه ټول اعضاء به مطمئن شي
تهٔ دَ زړۂ خوشحالي واخله چې ده ذکر کښې پهٔ دې کښې
زړهٔ بادشاه دے چې خوشحال وي نو دا ټول اعضاء خوشحال وي
چې دا ستا بادشاه خوشحال وي نو بيا دي مزې پهٔ دې کښې
روح دَ رب يو حکمِ خاص دے وي خوشحال دَ خدائے پهٔ ذکر
کهٔ لهٔ ذکر نهٔ غافل شوې نو بيا تنګ به ئې پهٔ دې کښې
شبيؔر وائې غافل مهٔ يه خدائے دَ ذکر نه مؤمنه
رسېدل کهٔ خدائے ته غواړې دَدې دي لارې پهٔ دې کښې