څهٔ مقام دے دَ نمونځونو زمونږ خپلو
طريقه ده دا لهٔ خدائے دَ اخستلو
کېفيت چې دَ احسان دې کښې نصيب شي
ده پوړکۍ دَ مرتبو بره دَ تللو
لوئے مقام دَ عبديت دې کښې نصيب شي
دَ خدائے مخکښې پهٔ ښهٔ شان پهٔ ودرېدلو
دغه نمونځ چې دے معراج دَ مؤمنانو
کوشش وکړه ښهٔ دَدې دَ زده کولو
کړه ظاهر پهٔ طريقه دَ محمد ﷺ ئې
اؤ باطن ئې بس دَ خدائے پاک دَ کېدلو
تېره نهٔ شي درنه يو هم پهٔ غفلت کښې
اې شبيؔره خيال ساته دَ لمحو خپلو