شېخ لکه دَ ژبې شي مريد لکه دَ غوږ پهٔ شان
بيا تحصيل دَ علم لدني جوړ شي پهٔ دې اسان
داسې دَ وئیلو اورېدلو محفلونو نه
جوړ دَ خدائے پهٔ فضل شي دَ عشق و معرفت دکان
ژبه چې دَ پير دَ خدائے پهٔ فضل کړي شروع ګفتار
غوږدې کړي مريد دغو خبرو وته بيا خپل ځان
خدائے پاک دَ مريد دپاره څهٔٔ چې ضروري وي نو
هغه بيا دَ پير پهٔ ژبه راوړي وي مريد حېران
دا دَ حېرانۍ خبرې نهٔ دي دا دَ خدائے کار دے
جوړ خدائے پهٔ خپل فضل داتعلق کړي دَ اصلاح سامان
داسې ځائے پکار وي چې دا کار پهٔ کښې کېدلے شي
دې ته خانقاه وائی اے شبيؔره دَ اصلاح ميدان