څرګند مخ ښکلې زيبا کړه پاک رسوله
دَ خپل ځان بس دے اوس ماکړه پاک رسوله
ګنهګار يم خطا کار يم امتي ستا
لاس اوس خپل پهٔ سر زما کړه پاک رسوله
پهٔ ګرداؤ کښې مې کشتۍ ده ګېره شوي
خدایٔ دَ پاره لاس نن راکړه پاک رسوله
ستا امت نن دَ ذلت خټو کښې بوخت دے
دې ذلت نه ئې جدا کړه پاک رسوله
شفاعت دَ پاره ستا زۂ اميدوار يم
دَ کرم نظر پهٔ ما کړه پاک رسوله
ستا دَ مينې خواهشمند يم زۂ شبير
خپله مينه راعطا کړه پاک رسوله