ده دنيا تلونکي راتلونکي دے مېدان دَ عملونو
فېصله ده پهٔ دې باندې دَهغه ځائے دَ څيزونو
عملونه ښهٔ دي ونې دَ جنت، دا ونې نال کړه
اؤ اخلاص دَدې اوبهٔ دي معامله دا ده دَ زړونو
قيمتي وخت خراب نهٔ شي پهٔ فضول کارونو دلته
بچ کول دَ ځان پکار دي ډېر لهٔ دې حماقتونو
پهٔ ګناه باندې مشغول کهٔ ئې نو لږ خو دا سوچ وکړه
څهٔ به وي کهٔ مرګ دې راغے پهٔ دې داسې حرکتونو
پهٔ توبه باندې ځان پاک کړه لهٔ ګناه نه اؤ دَ وړاندې
ژوند دپاره وکړه نيت اؤ بندوبست دَ ښو کارونو
ژوند زمونږه ويلي کيږي لکه واوره اے شبيؔره
دا دَ کار کړه دې دپاره وکړه سوچ پهٔ دې شعرونو