زۂ ټوټې ټوټې راغونډ شوم شومه بيا ټوټې ټوټي
زما زړۂ ئې امانت ؤ ځکه لاړهٔ ورپسې
نهٔ داخوب دے اؤ نهٔ خيال ورکښې نشته قيل و قال
زما زړۂ هلته کښې لاړو چې هغه ؤ چرته کښې
کله قرب راعطا کړي ما پهٔ ناز کله جدا کړي
زۂ ملنګ يمه دَ در ئې اؤ هغه دے راسرې
اوس هغه زما سره دے دَ بل جا سره زۂ نهٔ يم
نمونځ کښې ماته چې ملاؤ شي نو شي ختمې فاصلې
ټوله ورځ وم پهٔ دې سوچ کښې چې به کله را ملاؤ شي
چې دَ شپې ئې ملاقي شوم ختمې شولې انديښنې
دَدې لارې منزل دادې چې پهٔ زړۂ کښې هغه راشي
لېونتوب کښې شبيؔر ټيک شو عجيبه دي نندارې