الهامات

موافق دَ شريعت چې الهامات وي

هغه ټيک دي کهٔ اشعار کهٔ احکامات وي

مخالف دا دَ قران و سنت نه وي

دَ صاحبِ الهام هم چې ټيک حالات وي

مقصود نهٔ دي، دي محمود کهٔ دا حاصل شي

کرامات کهٔ کېفيات کهٔ کشفيات وي

دَ عمل ښهٔ نتيجه دغه کېدے شي

انحصار نه چې پهٔ دې دَ مقامات وي

دے موجود هر خېر قران اؤ پهٔ سنت کښې

پهٔ دې باندې منحصر به هر نجات وي

اے شبيؔره امان غاړه لهٔ کجۍ نه

دې دپاره پکار هم به مناجات وي