يو سلام دي خورول بل روټۍ پهٔ چا خورول
دريم حق دَ رشته دار دي پهٔ ښهٔ شان پوره کول
څلورم دَ تهجدو نمونځ کول هم کهٔ نصيب شي
پهٔ دې باندې شي اسان جنت ته ځان داخلول
دَ سلام عادت دې جوړ کړه هر مسلم وته سلام کړه
کهٔ ئې پېژنې کهٔ نه ورباندې دي مخکښې کېدل
دَ روټۍ خورول ښهٔ کار دے دعاګانې پهٔ دې واخله
دَ امت دا وږي تږي دي پهٔ خيټه مړول
پهٔ تا حق دَ رشته دار دے دَدهٔ حق پهٔ ځان پرېنږدې
دې باره کښې لهٔ الله نه دي هر وختې ويرېدل
تهجدو کښې لهٔ خدائے نه دعا غواړه اے شبيؔره
شي نصيب مو دَ الله رضا يعنې کاميابېدل