تکبر

يو دهوکه ده حماقت دے تکبر

ناپوهي ده سفاهت دے تکبر

کهٔ دَ خدائےمينه نصيب کښې دَ چا نهٔ وي

نو اظهار دَدې حالت دے تکبر

شېطان هم پهٔ دغه وجه ځان مردود کړو

دَ بدۍ يو لوئے طاقت دے تکبر

دعوې څنګه دَ لوئے والي څوک کوے شي

دا دَ نفس غټ رذالت دے تکبر

زمونږ دننه ګندګي اؤ ګندګي ده

پهٔ دې ګند کښې ښهٔ لت پت دے تکبر

سرئې ټيټ دے چې لهٔٔٔ ځان ځنې خبر دي

دَ ناپوهو بس حرکت دے تکبر

شبيؔر غواړي عاجزي تانه اے ربه

چې دشمن دَ عاقبت دے تکبر