دا قلم دَ زړۂ اواز رسول غواړي
فکر هم دے پهٔ خپل وس خورول غواړي
قال خو قال دے قيل و قال سره ئې کار دے
حقيقت دپاره حال جوړول غواړي
دَ عمل دغه مېدان دے عمل وکړه
پهٔ عمل خپل ، خپل دښمن سوزول غواړي
چې دَ عشق دې پهٔ ميدان کښې قدم کښېښود
تقاضې بيا پوره هم ئې کول غواړي
ننداره دَ حال پهٔ قال چا بيان کړي
عملاً به پهٔ دې ځان پوهول غواړي
تا دَ حال پهٔ اهميت به قلم پوه کړي
نور شبيؔره به پهٔ مخکښې بياتلل غواړي