وخت لا شته دے

څهٔ چې غواړې هغه وکړه وخت لا شته دے

عاقبت دې ځان ته ښهٔ کړه وخت لا شته دے

چې وخت تېرشي خلق لاس ورپسې مروړي

پهٔ کوو کښې سستي مهٔ کړه وخت لا شته دے

که دَ نفس خدمت دې کړے دے تر اوسه

خېر دے ځان اوس دَ هغهٔ کړه وخت لا شته دے

روح دې تنګ دے دَ خوراک خپل پهٔ تلاش کښې

اوس لږ رحم پهٔ دهٔ وکړه وخت لاشته دے

ذکر فکر نه کار واخلهٔٔ چې هوښيار شې

ښهٔ پهٔ دې باندې دې زړهٔٔ کړه وخت لا شته دے

اے شبيؔره ضرورت پوره کوه خپل

خواهشات دې لږ اودهٔ کړه وخت لا شته دے