بل کړه اور د عشق پهٔ زړۂ کښې زړۂ دَ يار سره واصل کړه
چې خوښيږي کوم دَيار نو خصلتونه ھغه خپل کړه
چې دَ يار تعريف پکښې وي محفلونه ھغه جوړ کړه
چې دې يار پرې خفه کيږي نو لهٔ ھغه محفل زغل کړه
زړۂ دَ يار پهٔ مينه مست کړه هم دَيار دَيار پهٔ مينې
اؤ کلام دَ محبت ئې پهٔ خپل زړۂ باندې نازل کړه
لهٔ هر څيز نه ور نيزدې شې ته لهٔ هر څهٔ پرې ورتېر شه
لامبوزن پهٔ سيند دَ عشق شه هېر دَ ځان نه ئې ساحل کړه
چې يو وخت هم درنه هېر نه شي هر وختې تاته ياد وي
اے شبيره ؔ يار پهٔ زړۂ کښې داسې رنګې تهٔ داخل کړه