څنګه

هوش پهٔ لېونتوب څوک راولي څنګه

پوه نهٔ يم خبر نهٔ يم دا وي څنګه

نفس چې مطمٔن پهٔ شريعت نهٔ وي

دا به بيا دَ خېر پهٔ طرف ځي څنګه

عقل چې لهٔ نفس ځنې اثر واخلي

عقل به دا نفس قابو کوي څنګه

عشقِ الٰهي چې شي حاصل چاته

بيا به شريعت شاته پرېږدي څنګه

عشق دے لېونتوب اؤ شريعت دے هوش

سترګې به بيا عقل پټوي څنګه

عشق پهٔ عقل برشي اؤ قابو ئې کړي

ګوره شوه پکار دا عاشقي څنګه

هوش چې دا دَ عشق نه پېدا شوے دے

نفس باندې کوي به دے څورلي څنګه

کړه قبول شبؔيره لېونتوب دغه

شې پهٔ هر څهٔ پوه به چې دادي څنګه