چې زړهٔ ډک لهٔ محبت دَ سيم و زر شي
دا فتنه ده بنده دې نهٔ دې خبر شي
زر تر زره څهٔ علاج دَدې پکار دے
هسې نه چې لهٔ علاجه هم بهر شي
زړهٔ دَ مال د محبت نه زر خالي کړه
هسې نهٔ چې تباهي دې مقدر شي
اف سزا دَدې ده څومره خطرناکه
باور وکړه تهٔ پهٔ ما کهٔ دې باور شي
صرف دا نه چې خالي شي بلکه ډک کړه
دَ يار مينې نه ، دې زړهٔ چې معتبر شي
لېونتوب کښې دَدې مينې هوش پېدا شي
پهٔ دې هوش دَ يار مطلب دې پهٔ نظرشي
دَ حرام مال نه دې کرکه بيا پېدا شي
مشتبه باندې دې هم زړګے اوتر شي
پهٔ خپل وخت زکوٰة هر کال وباسې خپله
چې پهٔ وخت دَ مستحق خېټې ته ورشي
نور انفاق کهٔ پکښې هم کېدے شي وشي
دَ عمل کاغذ به هلته دې بهتر شي
يه ژوندے شبؔيره خدائے دپاره دلته
قربان هم دې دَ هغه پهٔ لار کښې سر شي